Page:Chrétien de Troyes - Cligès, 1921.djvu/113

Tresqu’a tant que vos iert randue
La terre que tient vostre peres
Don vos devez estre empereres. »
Alixandres por cest otroi
Mercie boenemant le roi,
Et si conpaignon l’an mercïent.
Tuit li baron de la cort dïent
Qu’an Alixandre est bien assise
L’enors que li rois li devise.
Qant Alixandres voit ses genz,
Ses conpaignons et ses sergenz,
Tex con li rois li vialt doner,
Si comande gresles soner
Et buisines par tote l’ost.
Boens ne mauvés ne vos en ost
Que chascuns ses armes ne praingne,
Cil de Gales et de Bretaingne
Et d’Escoce et de Cornoaille,
Car de par tot sanz nule faille
Fu an l’ost grant force creüe.
Et Tamise fu descreüe,
Qu’il n’ot pleü de tot esté,
Einz ot granz secheresce esté,
Que li poisson i furent mort
Et les nes sechiees au port ;
Si poïst an passer a gué
La ou ele avoit le plus lé.
Outre Tamise est l’oz alee ;
Li un porprenent la valee
Et li autre montent l’angarde.
Cil del chastel s’an pranent garde
Et voient venir la mervoille
De l’ost, qui si fort s’aparoille
Por le chastel confondre et prandre ;
Cil se ratornent por desfandre.
Ençois que nul assaut i ait,
Li rois antor le chastel fait
Traïner a.iiii. chevax
Les traïtors parmi les vax