Page:Chrétien de Troyes - Cligès, 1921.djvu/107

Des que la traïson soucha,
De dobles murs et de fossez,
Et s’avoit les murs adossez
De pex aguz et de darciere,
Qu’il ne cheïssent par derriere.
Au fermer avoit mis grant coust.
Tot juing et juingnet et aoust
Mist au feire le roilleïz
Et fossez et pont torneïz,
Tranchiees et barres et lices
Et portes de fer coleïces
Et grant tor de pierre quarree.
Onques n’i ot porte fermee
Ne por peor ne por assaut.
Li chastiax sist en un pui haut
Et par desoz li cort Tamise.
Sor la riviere est l’oz asise,
Ne ce jor ne lor lut antendre
S’a logier non et as trez tandre.
L’oz est sor la pree logiee,
Tote Tamise est herbergiee
De paveillons viez et vermauz ;
Es colors se fiert li solauz,
Si reflanboie la riviere
Plus d’une grant liue pleniere.
Cil del chastel par le gravier
Furent venu esbanoier
Seulemant les lances es poinz,
Les escuz devant lor piz joinz,
Car plus d’armes n’i aporterent.
A ces defors sanblant mostrerent
Que gaires ne les redotoient
Qant desarmé venu estoient.
Alixandres, de l’autre part,
Des chevaliers se prist esgart
Qui devant aus vont cenbelant.