à ſon bord, pour ſçavoir s’il n’y avoit
point de guerre ; car quand il y a longtemps
que l’on a quitté la Françe, on
ne ſçait point à qui ſe fier, principalement
quand il faut aller moüiller chez
des Etrangers ; on me rapporta que c’eſtoit
un Vaiſſeau Marchand Anglois qui
eſtoit parti de Londres depuis cinq mois,
& qu’il n’avoit touché en nulle part,
qu’il alloit en droiture au Tonquin,
que le Capitaine luy avoit dit qu’il n’y
avoit point de guerre en Françe, & que
toute l’Europe eſtoit en paix, qu’il y
avoit cependant eu quelque revolte en
Angleterre par le Duc de Monmouth
qui s’éſtoit mis à la teſte de dix ou douze
mil hommes ; mais que les trouppes
du Roy l’avoient batu & fait prifonnier
qu’on luy avoit coupé la teſte, & qu’on
avoit pendu beaucoup de perſonnes que
l’on avoit auſſi priſes ; mais que cette
rebellion eſtoit finie avant ſon départ ;
il dit auſſi qu’il avoit veu la terre le
jour d’auparavant à ſept lieuës, ce qui
nous fit juger que nous devions en eſtre
à 30. ou 35. lieuës ; nous continuâmes
noſtre route le reſte du jour &
de la nuit, & le lendemain ſur les dix
heures nous vîmes la terre ſous le vent
de nous, à ſept ou huit lieuës, j’y fis
Page:Chaumont - Relation de l'ambassade de Mr le Chevalier de Chaumont à la cour du Roy de Siam, 1733.djvu/129
Le texte de cette page a été corrigé et est conforme au fac-similé.
126
Relation
