CCXLV.
APRES la nuit survient la matinee humide,
Du Soleil est suivi le matin ombrageus,
Apres le clair Soleil vient le ciel nuageus,
Apres l'obscur nuau vient la chaeur stupide.
Apres la chaleur vient le tonnerre rapide
Le tonnerre est suivi des esclairs orageus
Apres l'ardent esclair chet le foudre outrageus
Le temps clair & serain suit le foudre homicide :
Apres l'enfance vient la puerilité
Que la jeunesse suit, le jeune àge escarté
Succede la viellesse aus douleurs asservie :
Puis la Decrepitude arrive incontinant,
Que jusques à la mort la mort va talonnant
Et mourans par la mort nous retournons en vie.
CCXLVI.
NOSTRE ame est immortelle exemte du trespas,
Envoyee en ce cors comme en terre estrangere
Bannie hors de son lieu instable & passagere,
Vivant enveloppee entre mille debas :
Dont elle se lamente, & soupire icy bas
Comme un tyge fecond hors de la branche mere
Retranché & planté dans un terroir austere,
Sterile maigre et sec qu'on ne cultive pas ;
Et pleure jusqu'a tant quelle se soit rendue
Au logis eternel dont elle est descendue
Delaissant ce cors lourd duquel l'oppression
L'empesche de voler à la vie immortelle,
Que sans terme & sans fin malgré la mort cruelle
Maintient son possesseur en sa possession.
