CCVIX.
SI LORS que nous estions encores ennemis
DIEU nous à r'appointé par son Filz debonnaire,
Et reconciliez par sa mort volontaire,
Or il nous aimera, que nous sommes amis.
Car en ire & dedain nostre race il n'a mis
Ains selon sa bonté il l'a fait donataire
Du salut eternel, & son sanc salutaire
Nous à de nos pechez remission promis.
Regenerez en luy, ses fils nous sommes ore
Et nonplus serviteur, car quiconque l'honore
Vit en luy par la foy heureusement conjoint
Croyons & vivons bien, la sourde mort adonque
N'aura plus dessus nous authorité quelconque
De ceux qui sont en DIEU personne ne meurt point.
CCVX.
JESUS à esté fait nostre redemption
La rancon de nous tous, justice, & sapience,
Des captifs affligez l’heureuse delivrance,
Et des ceurs desolez, la consolation.
Pour les pechez du peuple heureuse oblation
Annoncant & preschant l'an de benevolence
De son Pere appaisé, & le jour de vengence
Qui fera des meschants juste punition :
Enseignant à tous ceux lesquels se glorifient
En leur propre vertu, qu'en luy seul ils se fient
Sacrifiant en ceur, & priant en esprit
Car si ressouvenant des vanitez du monde,
L'affliction de CHRIST en nos ames abonde,
La consolation nous abonde par CHRIST.
