CLXI.
Va par les carrefours des places desolees
De l’emperiere Rome, & sous les arcs bossez,
Et dans les temples sains à l’antique dressez,
Cherches des roys deffuns les riches Mausaulees,
Va sous les fondemens des colomnes moulees,
Et parmi les meulons des Thermes abaissez,
Et sous les escailliers des Theatres haussez,
Fouilles des vieus Censeurs les cendres escoulees.
Fauche parmi les os des simples laboureurs
Les Consuls Justiciers, & les fiers Empereurs
Pesle mesle sont mis sous la tombe fatale.
Voila le vray miroir ou se doivent mirer
Ces ceurs ambicieus, pour y considerer
Que la mort aus plus grans les plus pauvres egale.
CLXII.
Le magnanime Thrace animé de proüesse
Pleuroit de chaude larme à la nativité
De l'enfant exposé à la diversité
De tant de maus divers dont le sort nous oppresse ;
Mais quant l'heureuse mort le tiroit de la presse
Par un départ soudain de tant d'infirmité
D'un mouvement secret en soy-mesme agité
Riant il tesmougnoit sa joye & sa liesse
Ny riant ny pleurant, mais d'un sage maintien
Reglant nos passions à la mort du Chrestien
Monstrons avoir tousjours une ferme esperance
Qu'il rescuscitera & en ame & en cors
Quant le Juge eternel des vivans & des mors
Jettera sans appel la derniere sentence.
