La terre, comme il semble, immobile & solide
A souvent englouti meinte belle Cité,
L'air, duquel nous vivons, meintefois infecté
Nous abandonne & livre à la mort homicide :
Le boire & le manger, trop glout & trop avide
Nous oste meintefois la vie & la santé :
Le jeune trop estroit trop souvent repeté
Au sepulchre muet souvente-fois nous guide ;
Helas ! l'homme n'est point si tost homme nommé
Qu'il ne soit de sa mort avertis & sommé,
Ce mot d'homme & mortel est de mesme sustance.
Prier donc le Seigneur qu'il nous veuille eslougner
Du trespas impourveu, n'est-ce pas condamner
Devant sa majesté son peu de prevoyance ?
Alors que le deluge inunda l’univers
Les peuples de Noe mesprisant la justice,
Bancquettoient par ensemble, et vivans en delice
Furent à l'impourveu sous les ondes couvers :
Ainsi le Sodomite impudent & pervers
Sous le depart de Loth, gaudissant par malice
Ses Citez & ses bours vit choir en precipice
Devant l'ire de DIEU, tresbuschez à l'envers :
Voire quant moins peuplé avoit mis sa pensee
Au peril de la mort, sous la tour renversee
Il fust en Siloa rudement atterré ;
Telle est la fin de l'homme incertaine & douteuse,
Qui noyant dans la chair son ame vicieuse
Plustost que d'y penser, se voit mort enterré.