Par elles, et pour elles, sommes,
C’est la source de nostre joye,
C’est l’adresse des nobles hommes,
C’est d’honneur la droite montjoye ;
C’est ce qui les bons cœurs resjoye,
C’est le chief de mondains plaisirs,
C’est ce qui d’espoir nous pourvoye,
C’est le comble de nos désirs.
Leur serviteur vueil demeurer,
Et en leur service mourrai ;
Et ne les peux trop honnorer
Ne autrement ja ne voudrai.
Et tant qu’en vie demeurrai,
A garder l’honneur qui leur touche
Emploierai où je pourrai
Cœur, corps, sens, langue, plume et bouche.
Pitié en cœur de Dame siet
Ainsi qu’en l’or le diamant.
Mais sa vertu pas ne s’assiet
Toujours au plaisir de l’amant.
Ain s faut deffermer un fermant,
Dont crainte tient pitié enclose,
Et en ce fermoir deffermant
Souffrir sa douleur une pose.
Page:Chartier - La Belle Dame sans merci, 1901, éd. Charpennes.djvu/99
Le texte de cette page a été corrigé et est conforme au fac-similé.
