Page:Chartier - La Belle Dame sans merci, 1901, éd. Charpennes.djvu/90

et le cœur qui leur est demeuré ; mais que Espoir ne les laisse au besoin. Et encore auroient attente de vostre secours, et que Bel Accueil et Doux Attrait les remeissent sus. Se ne fut qu’il est venu à leur congnoissance, que aucuns ont escrit en vers rimes certaines nouvelles, où ils n’ont guère pensé. Et peut-être que envie, rebutement d’amour, ou fausseté de cœur, qui les a fait demeurer recreuz en chemin, et laisser la queste qu’ils avoient encommencée avec nous, les fait ainsi parler et escrire. Et tant ont fait, comme on dit, pour destourner aux autres la joie à quoi ils ont failli, que leurs escrits sont venus en vos mains ; et pour l’attrait d’aucunes parolles douces qui sont dedans, vous ont amusé à lire leur livre, que on appelle La Belle Dame sans Merci. Auquel sous un langage affaité sont enclos les commencements et ouvertures de mettre rigueur en la court amoureuse, et rompre la queste des humbles servans, et à vous tollir l’heureux nom de pitié, qui est le parement et la richesse de vos autres vertus. Et en adviendra dommage et eslongnement aux humbles servans, et amendrissement de vostre pouvoir, se par vous n’y est pourvu. Qu’il vous plaise de vostre