Un douloureux pense tousdis
Des plus joyeux le droit revers,
Et le penser des maladis
Est entre les sains tout divers.
Assez est-il de cœurs travers
Qu’avoit fait bientost empirer,
Et loyauté mettre à l’envers,
Dont ils souloient tant soupirer.
De tous soit celui deguerpis,
D’honneur desgarni et deffait,
Qui descongnoist et tourne en pis
Le don de grâce et le bienfait
De sa Dame qui l’a reffait,
Et ramené de mort à vie.
Qui se souille de tel meffait
A plus d’une mort desservie.
Sur tel meffait n’a court ne juge
A qui l’on puisse recourir.
L’un les maudit, l’autre les juge.
Mais je n en ai vu nul mourir.
On leur laisse leurs cours courir.
Et commencer pis derechief,
Et tristes Dames encourir
D’autrui coulpe, peine et meschief.
