Plaisir n’est mie par tout un,
Ce vous est doux qui m’est amer.
Si ne pouvez-vous, ou aucun,
vostre gré me faire aimer.
Nul ne se doit ami clamer
Si non par cœur ains que par livre ;
Car force ne peut entamer
La voulenté franche et delivre.
Ha ! ma Dame, j’à Dieu ne plaise
Qu’autre droit y vueille quérir,
Fors de vous montrer ma mesaise
Et vostre merci requérir.
Se vostre honneur veux surquerir,
Dieu et fortune me confonde,
Et ne me doint ja acquérir
Une seule joie en ce monde !
Vous, et autres qui ainsi jurent.
Et se condamnent et maudient.
Ne cuident que leurs sermens durent
Fors tant comme les mots se dient,
Et que Dieu et les Saints s’en rient.
Car en tels sermens n’a rien ferme,
Et les chetives qui s’y fient
En pleurent après mainte lerme.
