Comme la rose tourne en lermes
Au fourneau sa force et valeur,
Ainsi rend pitié aux enfermes,
Par feu d’amoureuse chaleur,
Pleurs qui guérissent la douleur
Par leur vertu puissant et digne.
Mais quant le dangier n’est pas leur
Plus en prisent la médecine.
Mon livre qui peut vaut et monte,
A nulle fin autre ne tent,
Sinon à recorder le compte
D’un triste amoureux mal content
Qui prie et plaint que trop attent,
Et comment reffus le reboute.
Et qui autre chose y entend
Il y voit trop, ou n’y voit goutte.
Quant un amant est si estraint
Comme en resverîe mortelle.
Que force d’amour le contraint
D’appeler sa Dame cruelle,
Doit on penser qu’elle soit telle ?
Nenny. Car le grief mal d’aimer
Y met fièvre continuelle
Qui fait sembler le doux amer.
Page:Chartier - La Belle Dame sans merci, 1901, éd. Charpennes.djvu/101
Le texte de cette page a été corrigé et est conforme au fac-similé.
