foibles et hebetés, qu'ils ne different de la beste que par la seule figure), et que l'ame brutale soit immortelle comme l'humaine, ou l'humaine mortelle comme la brutale : ce sont des illusions malicieuses. Car, outre qu'en cette faculté de raisonner l'homme a un très grand advantage par dessus elles, encores y a-t-il d'autres facultés plus hautes et toutes spirituelles, par lesquelles l'homme est dict l'image et ressemblance de Dieu, et est capable de l'immortalité, èsquelles la heste n'a point de part, et sont signifiées par l'intelligence, qui est plus que la ratiocination simple. Nolite fieri sicut equus et mulus, quibus non est intellectus
[1].
L’autre poinct à dire en ceste matiere est, que ceste preeminence et advantage d’entendement et autres facultés spirituelles, que l’homme pretend, luy est bien cher vendu, et luy porte plus de mal que de bien ; car c’est la source principale des maux qui le pressent, vices, passions, maladies, irresolution, trouble, desespoir : de quoy sont quittes les bestes à faute de ce grand advantage, tesmoin le pourceau de Pyrrho [2], qui mangeoit paisiblement au navire durant la grande tempeste qui transissoit de peur toutes les personnes qui y estoyent. Il semble que ces grandes parties de l’ame ont esté desniées aux bestes, à tout le moins
