du parler, sera au chapitre suivant. Au plaisir et desplaisir, combien que tous en soient capables, si est-ce que l'attouchement peust recevoir très grand douleur et presque point de plaisir ; le goust au contraire grand plaisir et presque point de douleur. En l’organe et instrument, l’attouchement est universel, respandu par tout le corps, pour sentir les coups du chaud et du froid ; les autres sont assignés à certain lieu et membre.
De la foiblesse et incertitude de nos sens viennent ignorance, erreurs et tout mesconte : car puis que par leur entremise vient toute cognoissance, s’ils nous faillent au rapport, il n’y a plus que tenir : mais qui le peust dire et les accuser qu’ils faillent, puis que par eux on commence à apprendre et cognoistre ? Aucuns ont dict qu’ils ne faillent jamais ; et que, quand ils semblent faillir, la faute vient d’ailleurs, et qu’il s’en faut prendre plustost à toute autre chose qu’aux sens ; autres ont dict, tout au rebours, qu’ils sont tous faux, et qu’ils ne nous peuvent rien apprendre de certain ; mais l'opinion,moyenne est meplus vraye.
Or, que les sens soient faux ou non, pour le moins il est certain qu’ils trompent, voire forcent ordinairement le discours, la raison ; et en eschange sont trompez par elle. Voilà quelle belle science et certitude l’homme peust avoir, quand le dedans et le dehors est plein de fausseté et de foiblesse, et que ces
