LIVRE 1 CHAPITRE 1
Qui est la cognoissance de soy, et de l’humaine condition. exhortation à s’estudier et cognoistre.
praeface à tout ce livre premier. Le plus excellent et divin conseil, le meilleur et plus utile advertissement de tous, mais le plus mal pratiqué, est de s’estudier et apprendre à se cognoistre : c’est le fondement de sagesse et acheminement à tout bien : folie non pareille que d’estre attentif et diligent à cognoistre toutes autres choses plustost que soy-mesme : la vraye science et le vray estude de l’homme, c’est l’homme. Dieu, nature, les sages, et tout le monde presche l’homme et l’exhorte de faict et de parole à s’estudier et cognoistre. Dieu éternellement et sans cesse se regarde, se considere et se cognoist. Le monde a toutes ses veuës contrainctes au dedans, et ses yeux ouverts à se voir et regarder. Autant est obligé et tenu l’homme de s’estudier et cognoistre, comme il luy est naturel de penser, et il est proche à soy-mesme. Nature taille à tous ceste besogne. Le mediter et entretenir ses pensées est chose sur toutes facile, ordinaire,
