<poem style="margin-left:8em; font-size:100%"> RONDEAU CXLI. Que pensé je? dittes le moy ; Adevinez, je vous en prie, Autrement ne le saurez mie ; Il y a bien raison pourquoy. A parler à la bonne foy, Je vous en fais juge et partie : Que pensé je ? dittes le moy; Adevinez, je vous en prie. Vous ne saurez, comme je croy ; Car heure ne suis ne demye Qu’en diverse merencolie; Devisez, je me tairay quoy. Que pensé-je ? dittes le moy.
RONDEAU CXLII. Cueur, que fais-tu? revenge toy De Soussy et Merencolie ; C’est deshonneur et villenie De laschement se tenir coy. Je t’ayderay, quant est à moy, Voulentiers ; or ne te fains mie. Cueur, que fais-tu ? revenge toy De Soussy et Merencolie. N’espergne riens, scez tu pourquoy ? Pource qu’abrégeras ta vie Se les tiens en ta compaignie. Desconfiz les et prens leur foy. Cueur, que fais tu? revenge toy.
