Nous le garderons en doulceur
Tant que vous retournez en arrière.
Contentez, car c’est la manière
Vostre hostesse pour vostre honneur,
Pour paier vostre belle chiere,
Laissez en gage vostre cueur.
Et se voiez nostre prière
Estre trop plaine de rigueur
Changeons de cueur, c’est le meilleur,
De voulenté bonne et entière,
Pour paier vostre belle chiere.
RONDEAU.
Réponse de Nevers.
Mon tresbon hoste et ma tresdoulce hostesse,
Treshumblement et plus vous remercie
Des biens, honneurs, bonté et courtoisie,
Que m’ ave^ fais tous deux, par vostre humblesse.
Aussi fay je de vostre grant largesse
Et tressoingneuse et bonne compagnie,
Mon tresbon hoste et ma tresdoulce hostesse,
Treshumblement et plus vous remercie.
Mon pauvre cueur pour paiement vous laisse,
Prene en gré, et je vous en supplie,
Enoultre plus, tant que je puis vous prie
Que m’ottroye^ estre maistre et maistresse,
Mon tresbon hoste et ma tresdoulce hostesse.
