Le texte de cette page a été corrigé et est conforme au fac-similé.
Espoir m’a dit que Léauté
Vous fera souvenir de moy
Car vostre bonne voulenté
Ne peult faillir, comme je croy.
Quant est à moy, je vous supply
Pensez que l’amoureux party
Que j’ay prins changier ne pourroye.
Certes avant mourir vouldroye.
Je vous promets qu’il est ainsi,
N’avez vous point mis en oubly ?
Amour a tort, se m’est advis,
Qu’il ne fait aux dames sentir
Les maulx où leurs servans sont mis
Pour les tresléaument servir.
Pour vous ma Dame, je le dy,
Car se vous saviez le soussy
Qu’Amours, pour vous servir, m’envoye,
Vous diriez bien que j’auroye
De droit, gangnié le don d’amy.
N’avez vous point mis en oubly ?
__________
