Page:Charles d Orléans - Poésies complètes, Flammarion, 1915.djvu/352

<poem style="margin-left:6em; font-size:100%"> CHANSON CXXVI. Et eussiez vous Dangier, cent yeulx Assis et derrière et devant Jà n’yrez si près regardant Que vostre propos en soit mieulx. Estre ne povez en tous lieux, Vous prenez peine pour néant, Et eussiez vous, Dangier, cent yeulx Assis et derrière et devant. Les faiz des amoureux sont tieux Tousjours vont en assoubtivant ; Jamais ne saurez faire tant Qu’ilz ne vous trompent, se m’aist Dieux, Et eussiez vous, Dangier, cent yeulx. CHANSON GXXVII. Patron vous fais de ma galée Toute chargée de Pensée, Confort, en qui j’ay ma fiance; Droit ou pais de Desirance Briefment puissiez faire arriver. Affin que, par vous, soit gardée De la tempeste fortunée Qui vient du vent de Desplaisance, Patron vous fais de ma galée Toute chargée de Pensée, Confort, en qui j’ay ma fiance. Au port de Bonne Destinée Deschargez tost, sans demourée, La marchandise d’Espérance ; Et m’aportez quelque finance. Pour paier ma joye empruntée, Patron vous fais de ma galée.