Page:Charles d Orléans - Poésies complètes, Flammarion, 1915.djvu/338

<poem style="margin-left:6em; font-size:100%"> CHANSON XCVIII. As tu ja fait, petit souspir? Est il sur son trespassement Le cueur qu’as mis à sacquement? A il remède de guérir ? Tu as mal fait de le ferir En haste, si piteusement. As tu ja fait, petit souspir? Est il sur son trespassement? Amours, qui t’en doit bien pugnir, A fait de toy son jugement ; Pren franchise hastivement , Sauve toy, quant tu as loisir ; As tu ja fait, petit souspir? CHANSON XCIX. Levez ces cueuvrechiefs plus hault Qui trop cueuvrent ces beaulx visages ; De riens ne servent telz umbrages. Quant il ne fait haie ne chault. On fait à Beaulté qui tant vault , De la musser tort et oultraiges : Levez ces cueuvrechiefs plus hault Qui trop cueuvrent ces beaux visages. Je sçay bien qu’à Dangier n’en chault, Et pense qu’il ait donné gaiges Pour entretenir telz usaiges; Mais l’ordonnance rompre fault, Levez ces cueuvrechiefs plus hault.