Page:Charles d Orléans - Poésies complètes, Flammarion, 1915.djvu/247

Trois fleurs de Lis d’or, et pour hardiesse
Fermer en toy, t’envoya sa Haultesse,
L’Auriflamme, qui t’a fait seigneurir
Tes ennemis ; ne metz en oubliance
Telz dons haultains, dont lui pleut t’enrichir,
Trescrestien, franc royaume de France
     En oultre plus, te voulu envoyer
Par un coulomb qui est plain de simplesse,
La unction dont dois tes Rois sacrer,
Afin qu’en eulx dignité plus en cresse.
Et, plus qu’à nul, t’a voulu sa richesse
De reliques et corps sains departir ;
Tout le monde en a la congnoissance.
Soyes certain qu’il ne te veult faillir.
Trescrestien, franc royaume de France
     Court de Romme si te fait appeller
Son bras dextre, car souvent de destresse
L’as mise hors, et pour ce approuver,
Les Papes font te seoir, seul, sans presse,
À leur dextre ; se droit jamais ne cesse.
Et pource, dois fort pleurer et gemir.
Quant tu desplais à Dieu qui tant t’avance
En tous estas, lequel deusses cherir,
Trescrestien, franc royaume de France.
     Quelz champions souloit en toy trouver
Crestienté ! Jà ne fault que l’expresse ;
Charlemaine, Rolant et Olivier,
En sont tesmoings ; pource, je m’en delaisse ;
Et saint Loys Roy, qui tist la rudesse
Des Sarrasins souvent anéantir.
En son vivant, par travail et vaillance ;
Les croniques le monstrent, sans mentir,
Trescrestien, franc royaume de France.
     Pource, France, vueilles toy adviser,
Et tost reprens de bien vivre l’adresse ;