maniere de baye qui en ſon entrée peut tenir quelques lieuës de large, & quelque peu dauantage de long, où il y a trois riuieres qui viennent tomber en la grand’Baye proche de l’iſle de Sainct Iean[1], qui a quelque trente ou trente-cinq lieuës de long, & à quelque ſix lieuës de la terre du Su. Il y a auſſi vne autre petite riuiere qui va tomber comme à moitié chemin de celle par où reuint ledict ſieur Preuert, où ſont comme deux manieres de lacs en cette dicte riuiere. Plus y a auſſi vne autre petite riuiere qui va à la painture. Toutes ces riuieres tombent en laditte Baye au Su-Eſt enuiron de laditte iſle que leſdicts ſauuages diſent y auoir ceſte mine blanche. Au coſté du Nort de laditte Baye[2] ſont les mines de cuiure, où il y a bon port pour des vaiſſeaux, & vne petite iſle à l’entrée du port. Le fonds eſt vaſe & ſable, où l’on peut eſchouer les vaiſſeaux.
De ladicte mine iuſques au commencement de l’entrée deſdittes riuieres, il y a quelques 60. ou 80. lieuës par terre. Mais du coſté de la mer, ſelon mon iugement, depuis la ſortie de l’iſle de Sainct Laurent & terre ferme[3], il peut y auoir plus de 50. ou 60. lieuës iuſques à la ditte mine.
Tout ce païs eſt très beau & plat, où il y a de toutes les ſortes d’arbres que nous auons veus allant au premier ſault de la grande riuiere de Canadas, fort peu de ſapins & cyprez.
- ↑ Aujourd’hui l’île du Prince-Édouard.
- ↑ On croit reconnaître ici, avec Champlain (édit. 1613, ch. III), l’entrée ou le canal du bassin des Mines, l’île Haute, et le port ou havre à L’Avocat, où « le fonds eſt vaſeux & ſablonneux, & les vaiſſeaux y peuuent eſchouer. »
- ↑ De cette sortie, qui est évidemment le détroit de Canseau, jusqu’au bassin des Mines, il y a, par mer, environ cent soixante lieues.
