«[Segnors, dist roi Yon, .i. conseil vous demant.
Ne me le donnes mie du tout à mon talent,
Mes si que bien en die li petit et li grant.
Kallemaines de France, l’emperere puissant,
Est entré en ma terre par moult grant mautalent.
[Si a en sa compaingne Olivier et Rolant.
Et tous les .xii. pers qui sont preus et vaillant,
Et bien .lx. mil de chevaliers puissans ;
N’i a cel qui n’ait armez et bon cheval corrant ».
Li rois tire sa barbe et son grenon ferrant] :
« Durement me menache, moi et toute m’a gent ;
Se je les fix Aymon tous .iiii. ne li rent,
Ne me leira castel, bourc ne vile en estant.
Mes onques le mien pere ne tint du sien .i. gant,
Non fera ja le fix en trestout son vivant.
Se il a avec lui Olivier et Roullant,
Et j’ai Renaut o moi et Guichardin l’enfant ;
Et se il a dus Naimes, Berenguier et Bruiant,
J’ai Guichart, Aalart, Amaugis le vaillant ;
Et se il a aussi Ogier le combatant,
J’ai Guichardin d’Espagne, Godefroi le puissant.
Se il a .xii. pers, je en ai autretant,
Se il a .c. mille homes, de .c. mile me vant.
S’il est rois, et je rois ; s’il a branc, et je branc.
Je demant vo conseil, ne le m’alez chelant ;
Conseillies moi à droit ; que Dex vous soit aidant.] »
Premerains a parlé [Godefrois li] gentis,
Niés fu le roy Yon et chevaliers hardis.
Il a parlé en haut, que ne se vaut taisir,
Où que il voit le roys, si l’a à raison mis :
« Moult me merveil de vous, par le cors saint Denis,
Que vous queres conseil des fiex Aimon traïr.
Renaus est vos hons liges et vos carneus amis.
Vo seror li donastes o le cors seignori.
Aquitié a vos marches environ cest païs ;
N’est encore pas li [ans] passés ne acomplis
Qu’il desconfit le roy Marcille de put lin
Et cacha .iiii. liues et tant que il l’ot pris :
Il vous en presenta le chief quant l’ot ochis.
Se vous avez talent que le veulliez fallir,
Congees les barons hors de vostre païs.
S’en iront en tel terre que bien porront garir.
Et je vous pri pour Diu qui onques ne menti,
