Où est alés Turpins ? gentis clers honnerez,
Ber, donne moi la crois, pour sainte carité.
Tous nus piez et en langez m’en irai outre mer.
Je servirai au Temple plus de .x. ans pour Dé
[Et irai, en bataille quant il iert commandé,
Si] ochirrai en camp Sarrasins et Esclers »
« Sire, chou dist Turpins, mar vous esmaierez ;
Issi va il de guerre qui [la vuet] demener.
[Une eure est li hons povre], l’autre riche clamez.
Ja ne verres, [si cuit], cest premier moys passer
Que nous auerons du leur, ja n’ert si pres gardés. »
« Sire, chou dist Rollans, boin conseil me donnez,
Issi le ferai jou comme vous le loes.
Le conseil de proudomme doit on bien escouter. »
A ichele parole sont es chevaus montés.
Il estoient .iii.c. tout jone bacheler
Des damoisiaus de France que jone que barbé,
Qui n’avoient cheval sur coi puissent monter.
A pié comme garchon lez en couvient raler.
Dessi à Montbendel ne se sont arresté,
[Ne du roi ne couvint novelle demander]
Ne la tente de paile ne [le dragon] fremé.
El paveillon duc Nayme en est Rollans entrés.
De la honte qu’il a estoit tous adolés
Que d’un jour trestout plain n’osa à court aler.
Franchois sont retourné courechié et dolant.
Atant es .i. message à esperon brochant
Au paveillon le roy est venus droitement.
Il descendi à pié du destrier auferrant
Et salue le roy bel et courtoisement :
« Chis dame Diex de glore qui forma toute gent,
Saut et gart Klem. et son barnage grant.
Ne vous courechiez mie, se vous di mon talent.
Desbareté nous ont li fil Aimon le blanc.
Il ne nous ont laissié cheval ne garnement,
Paveillon ne aucube nis le dragon Rollant. »
Quant l’entent l’emperere, à poi d’ire ne fent ;
Saint Denise de Franche jura par maltalant :
« Trové avez le gal que aliez querant ».
.i. sorgant en envoie par toute l’ost criant
Que tout viegnent au roy tost et isnelement.
De toutes pars y vienent li chevalier vaillant
Et li duc et li prinche et li conte poissant.
Page:Castets - La Chanson des quatre fils Aymon, 1909.djvu/981
Cette page a été validée par deux contributeurs.
953
appendice
