Franchois s’en sont torné vers le coste d’un mont
Moult s’en vont dementant de la perte Kallon.
Gascoing s’en retornerent, li nobile baron.
O l’eschec que il ont, ont passé Balenchon ;
Dessi à Montauban n’i ot arrestison ;
En la ville s’en entrent li chevalier baron.
Garcoing se desarmerent qui grant [mestier en] ont.
Et Maugis est montés sus le plus maistre tour.
A une des bretesques a levé le dragon.
.i. vent venta seris qui mena le pignon
Si que tres bien le voient chil de l’ost environ,
Meïmez l’emperere dedens son paveillon.
Adont quida roys Kallez che fust Rollans li prous.
De riviere repaire Rollans li niés Kallon,
Oliviers de Viane à .xxx. compaignons.
A l’encontre lor va dans Rambaus li Frisons,
Par contraire lor dit : « Plenté d’oisiaus avons.
Or penses du bien faires, par le cors saint Simon !
Boins marcheans serez, se nous y gaiegnons,
Car li pires nous couste .iiii.m. mangons
Del plus fin or du monde c’onques eüst nus hons.
Desbareté nous ont li .iiii. fil Aimon.
Il ne nous ont laissié nesune rien du mont,
Palefroi ne destrier, aucube ne dragon. »
Quant l’entendi Rollans, à poi d’ire ne font.
Il descendi à terre, si s’asist sor .i. mont,
Par mautalent souspire, sa main à son menton.
Franchois y sont venu à coiste d’esperon.
Isnelement s’assirent entor et environ.
N’i a nul qui ne tiegne sa main à son menton.
Rollans li niés Kallon fu moult grains et iriez,
De la honte qu’il ot dolans et courechiez.
Turpin en apela le preu et le sené ;
Richart de Normendie n’i a pas omblié.
« Baron, chou dist Rollans, quel conseil me donrez ?
Nous estions .ii.m. de chevaliers membrés
De damoisiaus de Franche de nouvel adoubez,
De tous les plus proisiez que poions trouver.
Au gués de Balenchon oi fait tendre mon tref.
Onques nen oi tel duel en jour de mon aé
De chou que chil glouton m’ont si desbareté.
Jamais devant le roy n’oserai retourner.
Asses est qui dira cose autre que verté.
Page:Castets - La Chanson des quatre fils Aymon, 1909.djvu/980
Cette page a été validée par deux contributeurs.
952
appendice
