De Puille et de Calabre et d’Acre et [d’Ascalon].
« Seignor, or m’entendez, dist Raimbaus li Frison,
Je ne m’esmerveill mie des .iiii. fiex Aimon
Que il guerroient Karlle que si boin rechet on[t]
Que plus y pert d’avoir qu’en Orliens et Soissons.
Se Dame Dix n’en pense, ja cestui nen prendrons. »
« Merveilles aves dit, li dus Rollans respont.
Nous preïsmez par forche [le Sainne] Justamont,
S’abatismes par forche le tour et le dongon,
Si conquis l’oriflambe à forche et à bandon.
Tout sont mort et vaincu, se no talent ne font. »
Mais ains ne verra vespre ne le soleil escons
Que tel paor fera Renaus, le fil Aimon,
Que tous li plus hardis vaurroit estre à Mascon.
Devant son tref estut dans Rollans li niés Karlle,
Turpins et Oliviers et li riches barnages ;
[Et voient la riviere et les oiseaus salvages,
Les grues et les gantes, les cignes, les otardes].
Son oisel demanda Rollans, qui tant fu sage,
Chil les ont aporté qui lez orent en garde.
Dusques à .xxx. en montent, sur les mulez d’Arabe
Et chaignent les espées que n’i orent plus d’arme.
Esbanoier s’en vont contreval le rivage.
Pris[r]ent par le riviere les oiseillons sauvages.
Anchois que demi liue en ont cargié grant masse.
Turpins, li archevesques, remest au tref de paille
Et Ogiers li Danois et li riches barnagez.
Devant lor conte .i. clerc qui moult par estoit sage,
Si com Troie fu prise et apres Romme faite.
Iluec et une espie qui ne se targa gairez.
Nés fu de Montauban et il et son lignage,
Mais il lor escapa par une croute gaste,
Au plus tost que il pot afula une cape.
Isnelement s’en torne contreval le rivage,
Outre s’en est passés, si se fiert ou boscage,
Trouva une cariere, cavée fu et large,
Dessi à Montauban de courre ne se targe.
Tous les degrez en monte sus ou palais de mabre,
Iluec trouva Renant et ses frerez les sage ;
Chis lor contera ja les nouvelez moult asprez,
De quoi nostre Franchois recheürent damage.
Li messages en est sus ou palais montez.
Où que il vit Renaut, si li a escrié :
Page:Castets - La Chanson des quatre fils Aymon, 1909.djvu/974
Cette page a été validée par deux contributeurs.
946
appendice
