Vers Orlliens ont guenchi la fort chité garnie,
Mais se Dix nes sekeure, moult est courte lor vie,
C’à l’entrée d’Orliens, à une voie antie,
Trouvent un damoisel de moult grant seignerie ;
Maugis a reconnut, à la chiere hardie,
Qui embla le tresor en la grant manandie.
En la ville est venus par moult grant aatie,
Le cri a fait lever et la cloque bondie ;
As armes keurent tout, la ville est estormie,
Encontre nos barons ont lor voie akeublie.
Quant Renaus les coisi, n’ot talent que en rie.
A Maugis dist Renaus : « Chou est par ta folie,
Tu nous a malbaillis, se Dix ne nous aïe. »
« Seignor, chou dist Maugis, ne vous esmaies mie.
Bien vous en passerai, se Dix me donne vie. »
A sa malle est venus, une boiste a saisie,
.I. ongement i ot qui fu fais en Cubie,
A la porte d’infer, par moult grant dyablie,
Et puoit plus assez que carongne pourrie,
Ne riens que onques fust veüe ne coisie ;
Et Maugis le trait hors, que ne se targe mie,
Chil qui sont entour lui ont la puor sentie,
Et dist li un à l’autre : « Par Diu, le fil Marie,
Qui nous a or donné ichi tel punaisie ? »
Pour .i. poi que li ame n’est de Renaut partie.
Mais Maugis le raclot, en son sain l’amuchie,
Puis a traite une herbe de moult grant seignorie,
A cascun en donna, puis lor dist bien et prie :
« Seignor, qui n’en auera, [il] perdera la vie.
Si tiengne chestui herbe par devant sa narine. »
Là verres ceste gent porer petit esbahie,
Ains mais pour tel engien ne fu gent si honnie.
Lors hurtent les chevaus et Maugis lor enguie,
Chelle pueurs s’espant parmi la praerie,
Orlenirs ont sentu choie grant punaisie.
« Fi ! Fi ! » font li bourgois ; n’i a cheli ne die :
« Qui plus ira avant, ja ne verra Complie. »
Ains c’on eüst alé le trait à une archie,
S’en fuï chele gent, ainsi fu departie.
La voie et le chemin lor ont toute guerpie.
Et chil passerent outre que ne se targent mie.
Grant grace rendent Diu, le fil sainte Marie,
Page:Castets - La Chanson des quatre fils Aymon, 1909.djvu/958
Le texte de cette page a été corrigé et est conforme au fac-similé.
930
appendice