Quant Renaus voit Baiart à genou[llon]s tiere,
.i. petit s’arresta, s’a de cuer souspiré,
S’espée mist arriere, [es-le] vous arrestez.
Quant le vit à genous ploié et acliné,
Moult en a il le cuer et tristre et abosmé :
«Hé Dix ! chou dist Renaus, boins roys de maïsté.
Comment ferai [je], las ! si grant desloiauté ?
Chis chevaus m’a servi tous jours et honneré
Et de tant grant peril a il men cors geté,
Pendu m’eüst li roys plus a d’un an passé
Se chis chevaus ne fust, sachiez, par verité.
Chertes se jou l’ochis, ensi sommes alé.
Li roys nous pendera par vive poesté.
Et mi frere ront si lor chevaus en chierté
Que tout .iii. ont sur sains et plevi et juré
Que nul n’en ochirront pour nule povreté.
Hé Baiars, boins destriers, com mal aves ouvré.
Qui a tel traïtor avez tous jours esté
Et tant l’aves servi et tant l’aves porté,
Et traïtes sui voir quant ne t’ai deffié,
Et si t’ai atachié com traïstes prouvés.
Foudres, que ne m’ochis, quant itant ai dervé !
Ne viveroie sans Baiart .i. seul jour ajourné.
Par ichel saint Seignor qui maint en Trinité,
Je m’ochirroie anchois à mon branc acheré.
Baiart, se je t’ochis, ja n’aie jou santé ;
Et se ja vostre cors que je tieng en chierté
Est ja mengiés [par] moi, jou t’ai asseüré.
Mais par ichel Seignor qui le monde a formé,
Jou mengeroie anchois mon frere le mai[n]sné
Que jou aim plus asses c’omme de mere né
Que ne feroie toi, trop en ai grant pité. »
Grant doulor a Renaus pour son cheval menée
Et pour ses compaignons que famine est prouvée.
Vers le chiel contremont a sa chiere levée ;
De la tres grant dolour et de la grant pensée
Chaï entr’aus pasmés, en la plache aombrée.
Si frere l’ont veü que la geule ot baée,
Quident que l’ame en soit partie et dessevrée.
Ains mais si grant dolour ne fu [par] aulz menée
Ne pour homme vivant en chest siecle esgardée.
Guichars se debatoit comme beste dervée,
Richars chaï pasmez tres enmi de la prée.
Page:Castets - La Chanson des quatre fils Aymon, 1909.djvu/956
Le texte de cette page a été corrigé et est conforme au fac-similé.
928
appendice