Tel pité ont des cuntes qu’il comence à plorer.
Or oiez cun il velt lur assals desturber.
Dan Girard l’Espanois ad Ogier apelé.
A trente chevalers sunt en un pui munté,
Gardent vers Muntalban le grant chemin ferré,
K’i n’i isseit nul home que de mere seit né.
« Kar par le seint apostre qu’hom quiert en Neirun pré,
Si Malgis le lere en ad oï parler,
Une sule novele à nul home cunter,
Ke Renalt et ses freres seient ici enserrez,
Il est fiz de lur aunte et de lur parentez.[1]
Le quer ne pout mentir qui de preudume est nez.
Il nus aportereit le freit mes al digner
Ke trestut les plus cointes sengnerunt les costez. »
« Sire, ceo dist Girard, si come vus comandez. »
Come il unkes ainz pout, il en vint à sun ostel.
A trente chevaliers est à un pui munté.
Deleez une bulsere, là se sunt aresté.
Li alquant descendirent des destriers sujurnez,
E li plusor s’apuerent as espiez neelez,
Gardent vers Montalban le grant chemin ferrez.
Ne virent eissir nul home ke de mere seit nez.
Ci comence le romanz de quatre fiz Eadmund[2]
« Signurs, ceo dist Renaut, oez [et] escutez :
Si porrez ja oïr cum fu desheritez,
E hors de duce France enchaciez et jetez.
Ceo fu à Pentecuste, une feste en esté,
Que Charles tint sa curt à Loün la cité
E out ovecke lui quatre rois coronez,
Estre l’autre barnage dunc il i out asez.
Il m’i ocist mun uncle dunt jo ai mun quer irez,
Le duc Boes d’Egremunt dunt jo ai mun quer irez,
Cil fu, pere Maugis le bon larun senez.
