Si com sont vers Tremoigne que li mostier aperent,
Tuit li saint de la vile tot de loing en sonerent.
Quant li clergie lo virent, merveille lor samblerent.
Par tote la cité les noveles alerent,
Frere, por quoy pensastez vers nous tel cruauté,
Site, qui nous guerpistez par nuit et en enblé ? »
Donc se resunt ensemble au caret acoté
Et baisierent le cors eu vis et eu costé.
Si tost comme il relievent, si filz sunt escrié :
« Pere, or remanon nos dolent et esgaré. »
[Errant a pris] cascun .i. coutel aceré,
Si s’en ferist eu cors, eu cuer et eu costé :
« Quer james n’auron joie en trestout nostre aé »
Segnors, ce sachiez vous, sans point de fausseté.
Que il n’a si dur home en la crestienté,
S’il oïst la dolor, qu’il n’en eüst ploré.
Quant li frans archevesque out oï lez barons
Qui por lor frere mainent eci grans marrïsons,
Il lor a dit en haut, ne mie en consellons :
« Segnors, lessies le duel, por Dé vous en prions
Quer il est sains martiz, quer de voir le savon,
Eu servise Dieu faire martiré par felons.
Ci en font or par terrez grans persecutions. »
« Sire, dient li frere, por Dé qui tot forma,
Comment fu mort Renaus, ne nous celes vous ja. »
« Segnors, bien le saures, l’archevesque dit a,
Mes mont fu esgarez comment il vous lessa ;
Et qui, por Dieu servir, en essil en entra.
A Cologne la grant de son gré s’aresta,
En l’euvre de saint Pere de mont bon cuer ovra ;
Por l’amor dame Dé son cors i travella,
.i. denier se louet, mes ja plus n’en vallast.
Pain et eve menjoit, autre rien ne gosta.
Plus faisoit par son cors, eci... tesmoigna,
Que tuit li autre ouvrier qui i erent piécha.
De cen orent envie le traïtor mortal.
En traïson, beau sire, cascun le lapida.
Ens eu Rin le geterent que il ne s’en garda.
Par le plaisir de Dieu arriere retorna.
Bien savon qu’il est sains et que por Dieu ouvra.
Dieu fist por li miracles telez que orrez ja.
