Page:Castets - La Chanson des quatre fils Aymon, 1909.djvu/913

885

les quatre fils aymon

18115[Puis apela Renaut, sans point de delaier] :^[1]
« Amis, veneis avant, por lo cors saint Legier.
A vos n’a nus covent, n’i a for[s] do paier.^[2]
Prenes ce qu’il vos plait, n’i a rien del neier. »^[3]
Renaus passa avant, si a pris .i. denier.
18120« Ostes, ce dist li maistres, por lo cors saint Richier,^[4]
Sis en aures au mains, que ge ne voil pechier,
Et mais cascun jor .xii., se voleis gaaignier,
Car ains ne vi et mont nul tres si bon ovrier. »
« Sire, ce dist Renaus, ice fait à laissier.
18125Hu[i] mais n’en aurai plus, par les Sains desoz ciel.^[5]
Ge voil avoir aumosne, si me veul travellier ;
Et si n’en parles ja, por amor Dieu do ciel.
Ge ne voil fors ma vie por mon cors solagier. »
« Amis, ce dist li maistres, ice fait à laisser.
18130Vos pa[n]res à vos chois, ne vos quier rien neier. »^[6]

Tot issi l’ont laissié, n’en vellent plus parler,
Et Renaus s’en ala en la vile osteler.
Si achata do pain, n’ot plus à son soper.
Lendemain vint à l’euvre, quant il dut ajorner,
18135[Mais n’i trova nului, s’est alé aorer]^[7]
Devant l’autel saint Pere, por la messe escoter
Que chantoit l’archevesques, [car] il devoit errer.^[8]
Issi com el fu dite, vindrent maçon ovrer.
Quant amont sont monté ò vellent governeir,
18140Il demandent l’ovrier qui tel fais selt porteir.^[9]
Quant Renaus a oï l’un et l’autre parler,
Il est venus à elx et prist à demandeir
Se il voloient pere o mortier por ovrer.

1. 18115 Sic B. L manque. A Le maistre voit le duc, si li prist à huchier.
2. 18117 L for. Cf. v. 18150. B fors du.
3. 18118 B n’i a que delaier.
4. 18120 A Estez, ce dit le maistrez, ce ne vous est mestier.
5. 18125 L Humais. B Huimaiz.
6. 18130 L pares.
7. 18135 Sic A. L manque. B ne trouva nului. s’ala Diu aourer.
8. 18137 L quant. B car.
9. 18140 A B seut.