Encor voldra plus fort, ice veit et otroie.[1]
Il ne trova nule ordre ò encor se ravoie.[2]
Par tot trova .i. pont qui auques li desvoie.
Tant a alé Renaus et amont et aval
Que il vint à Coloigne, el mostier principal,
El mostier de saint Pere qui est esperital.
Les .iii. Rois aora, vers aus a cuer loial ;
Puis regarda avant par devers lo portal.
Si i vit maçoner en maint leu contreval,
Li un portoient piere dont il ont maint jornal,
Li autre eve et mortier, [que] molt lo[r] faisoit mal.[3]
Et dit à soi meïsmes : « N’i ont auques chalval.[4]
Si m’aïst Damedex li pere esperital,
Ge cuit ci laborer, or n’i a mais estal. »[5]
Renaus fu el mostier, si i vit maint ovrier,
Li un portoient pierre et li autre mortier.
« Par Dex, ce dist Renaus, qui se velt travellier
Por l’amistié de Dex qui toz a à jugier,
Meillor gré l’en saura li verais justissier
Que hoer en ces bois ne ces herbes mangier :[6]
S’arme i puet miels sauver que penre nul loier.[7]
Ge i voldrai ovrer, se l’an m’i velt laissier.
Je n’i voldrai avoir de .ii. jors c’un denier.
Ases en aurai pain por men cors solagier. »
Dont regarda avant ; devant l’uis d’un herbier,[8]
Vit lo maistre maçon contreval le clochier.
Renaus en vint à lui, si ne lo volt laissier,
De Dex lo salua, lo verai justissier.
« Amis, cil te garisse qui tot a à jugier. »
- ↑ 18003 B vaurra plus faire, il se pense et otroie.
- ↑ 18004 Du mot ordre vient peut-être ce qu’intercale l’édition populaire : Cependant il sortit de la forêt et trouva une maison de religion où il passa la nuit. Les frères de l’endroit voulurent lui donner à manger, mais il n’accepta rien d’autre que du pain et de l’eau. Le lendemain matin, il se remit en route et marcha si bien qu’il arriva à Cologne sur le Rhin.
- ↑ 18013 Sic B. L qui molt lo faisoit mal.
- ↑ 18014 B n’i ot homme carnal.
- ↑ 18016 B desormais à estal.
- ↑ 18022 B Qu’aourer en un bos et.
- ↑ 18023 B Sauver s’ame porroit, qui ne penroit loier ?
- ↑ 18027 B herdier.
