Se ils sont hui vaincu, ce soit por lor boffoi,
Par icel Dex de gloire qui fist lo soroil bloi,
Je les ferai ja pendre là fors à cel [beffoi],[1]
Tot maugré lor lignage que de là l’eve voi.
Se sont vaincu li autre, mort seront à belloi. »
« Par Dex, ce dist Rollans, ge l’otroi endroit moi.
Renaus, ce dist Rollans, est ce donques par toi
Que tes frere est armés qui là fait tel conroi ? »
« Oïl voir, dist li dus, celer ne [le][2] vos doi,
Mais loaument vos di, desor tote ma foi,
Grifons est enbuschiés là jus en cel aunoi.
Por la crieme de lui ne me feïst annoi,
Fis ge Richart armer, ge lo preng bien sor moi. »
« Par Dex, ce dist Rollans, qui fist et moi et toi,
Qui hui sera pendus, se Jhesus me port foi,
Pendus sera en haut, que tele en iert la loi. »
« Sire, ce dist Renaus, et ge le vos otroi. »
[Richars][3] de Montaubain, quant vit lo roi venir,
O lui ta[n]t[4] des barons que il fist fervestir,
Don sout il bien de fi Grifon[s] ne pot laidir.
Il en vint à ses hommes, si cria par aïr
Que il voissent ariere lor armes devestir,
Bien est gardeis li chans, Grifons n’i puet nuisir.
« Non voir, ce dient tuit, bien lo puet l’on veïr. »
Adonc se departirent de merveilleus aïr
Et Richars se desarme qui ne voust plus soffrir,
Puis monta el cheval que l’an li fist venir,
Si a fait .i. eslais, nel pot contretenir,
Si est saillis en Sainne, bien lo puet l’an veïr.
Li destriers lo porte oltre, n’ot garde de perir,
Quant lo vit Charlemaignes, à lui prist à venir.
Puis li a escrié que bien lo pot oïr :
« Richars, [li fils Aymon][5], volies moi honir ?
Cuidies vos mon champ par armes desconfir ? »
« Sire, ce dist Richars, onques n’an oi desir,