Page:Castets - La Chanson des quatre fils Aymon, 1909.djvu/872

844

les quatre fils aymon

16915Par droit [seres menés] à cort d’ampereor. »^[1]

Molt s’estoit merveillié tote la baronie
Que Renaus ne venoit à la chiere hardie.
Que qu’il vont devissant en la chambre polie,
[Es] vos Renaut lo conte à la chiere hardie ;^[2]
16920Par mi la maistre rue a la vile estormie.
Ces ostelx vont prenant cele bone mesnie.
De l’or et de l’azur la vile reflambie,
Cil cheval se deroient, si font grant henerie.^[3]
Ce dient cil borjois baset, à vois serie :
16925« Dex, qui sont ceste gent, por Dex lo fil Marie ?
Est dont Paris en guerre, quant vient à ost banie ?
Je cuit molt bien et croi, mar fu fait l’envaïe.
Ce sont li fil Aymon que l’an ne vaintra mie ».
Lors menerent tel noisse par la cité antie
16930Que là sus el palais fu la novele oïe.
« Ha Dex ! dist Charlemaignes, dame sainte Marie,
Qui gent ont cele vile si forment estormie ? »^[4]
Quant .i. sergans i vint, hautement li escrie :
« Sire rois deboinaires, ne te celerai mie.
16935Onques puis icele ore Dex vint de mort à vie,
N’entra mais à Paris si grant chevalerie.
La vile ont si porprise et de gent bien garnie
Que il n’i a ruele qui ne soit tote enplie. »
« Qui sont il ? dist li rois, no[n] me celer tu mie. »^[5]
16940« Ne sai, ce li dist cil, n’an ai novele oïe. »

Or est Paris emplis, n’i a vuide ruele.
[Renaus] monta là sus et sa maisnie bele.^[6]
[Charles] lo vit venir qui fu les la tornele.^[7]
Molt l’a bien conneü au vis, à la maissele,
16945Apres lui vit ses freres qui [ont] color novele,^[8]
Par devant l’emperëres toz li cuers li [sautele].^[9]

1. 16915 L se revenes. A seres menés.
2. 16919 L. Est vos.
3. 16923 A desroient... crierie.
4. 16932 A quel gent.
5. 16939 L no. A ne me.
6. 16942 L K au lieu de R. A Regnaus monte ou palaiz.
7. 16943 L R au lieu de K. A Quant Charles l’a veü.
8. 16945 L a.
9. 16946 L faucele. A sautelle.