Par traïsson n’ocist homme de mere né. »
Adonc sailli Rollans, Olliviers l’alossez,
Dus Naimes de Baviere et Ogiers l’adurez,
Richars de Normendie et Torpin l’ordonés,
Tuit s’escrient ensamble com baron alosés :
« Rois, nos les plegeron que au jor les raures. »
« Seignor, ce a dit Charles, il vos soient livrés.
Ne sont pas chevalier, ice molt bien saves ;
Mais par ceste corone, don ge sui coronés,
Chevaliers les ferai, demain ice verres.
Si manderai lor pere, qui les a engendrés,
D’ui cest jor en trois mois seront en champ mellé. »
Icist jorz trespassa qui gaires n’a durés.[1]
Lendemain par matin sont li enfant levés,
Lavé sont et baignié, de noviax dras parés.
Charles les adoba qui molt les a amés ;
Por la lor amistié .c. en a adobés
A cui il donra armes et destriers sejornés.
[Chevalier sont li frere de la main Charlemaigne].[2]
Puis a mendé lor pere que n’i fist demoraingne,
Que il venist à cort, aveuc lui sa compaigne,
Veoir cele bataille qui prisse est par engaigne.
Quant li dus a oï que si aloit l’ovraigne,
Donc a mendé ses freres que il pas ne dedaigne.
Il enmaine grant gent, n’i a nus qui s’en faigne ;
Chevauchent vers Paris, par plain et par montaigne,
O chevax et o armes d’Aufrique et d’Alemaingne.
Renaus jure sovent saint Malot de Bretaigne,
Mar i fu faiz l’apiax, ce n’es[t] pas bel ovraigne.[3]
Or chevauche li peres secorre ses enfans.
Charles fu à Paris qui en fu molt dolans,
Quant [cil sont] apelé par si fait covenant :[4]
Mais bien croit en son cuer, si n’en fu pas dotant,
- ↑ 16867 A Li vespres aprocha, li jor est declinez.
- ↑ 16873 Sic A. L Chevaliers fait li freres lendemain Charlemaignes. Il ne s’agit plus de lendemain, ils viennent d’être adoubés.
- ↑ 16883 L es. Apiax, plus loin apialx ( (l exponctué) = appel.
- ↑ 16886 L sil ont. A Por l’amor de l’apel qui est fait es enfanz.
