Puis revint el pales asez hastivement.
Ses freres, a trovés molt tenrement plorant.
Allars tenoit Aymon, color muoit sovent,
La duçoise se pasme, qui de dolor a tant.
[Tuit regretent] Maugis, tenrement [vont] plorant.[1]
Quant Renaus l’a veü, molt [grant] pitié l’en prent[2]
Dont vint à la duçoise, et cria hautement :
« Dame, por Deu merci, n’aiez tel maltalent.
Se Dex done la nuit qui ert procenement,[3]
Je cuit faire tel cose, par le mien escient,
Dont auron à mangier assez à no talent. »
« Frere, dit Aallars, ki envers lui s’atent,
Soufrir le nos estuet, qui c’an ait maltalent. »
Icil jorz si passa, ki ne demora gaires ;
Et quant il fist seri, dont lor vint lor contraire,
Renaus vint [à ses freres], si lor prist à retraire :[4]
« Aler vœl à mon pere, savoir qu’il voldra faire ;
Se morir nos laira et itel honte traire. »
« Frere, ce dit Richars, avœc vos volronz traire.
Se somes perceü par nesun mal afaire,
Ensamble torneronz droit à nostre repaire. »
« Baron, ce dit Renaus, ice ne me puet plaire.
Ci vos lairé toz sols, de vos n’avons que fere.
Se n’aport à mangier, par cel qui tot esclaire,
Baiart vos abandon, se le poes desfaire. »[5]
Que Renaus s’en issi, à son pere [volt] tendre ;[6]
Bien sot son pavellon, nus ne l’i pot desfendre.
Aymes estoit levez, ne pot bon somme prendre ;
Issus estoit del tref, por oïr et entendre
Comment le font laienz, s’il se poront desfendre.
Renaus conut son pere o le hiaume resplendre.