Tant baron i ala, bien le puis afermer,
Qui faintement asaillent quant vint à l’assembler,
Renaus les vit venir, et Allars au vis cler,
Et Richars et Guichars ki bien sorent [jeter] ;[1]
Se pierres ne lor falent, maint en feront verser.
Or sont François venu droitement au fossé ;
Il asaillent à force, ne sunt pas refusé,
Et monterent as murs ; mainz en i fust ranpés,[2]
Ne fust li dus Renaus et Richars l’adurez
Et Allars et Guichars ki à force ont rué.
La duchoise lor a maint carrel aporté,[3]
Et il ruent à force, si en ont maint versé.
Tant ruerent li frere et tant se sunt hasté
C’onques n’i ot un sol de si haut parenté
Qui venist as creinialz, tant par i ont rué.
Qui est atainz à cop, morz est et afolés.
Tant en ont rué mort li baron naturel,
Tot le fossé en cœvrent environ et en lé.
Quant le vit Charlemaignes, molt en fu aïrez.
Bien vit ja nen ert pris por home qui soit nez.
Il fait soner retrait, de grant ire alumez.
François tornent arriere, qui furent mal [menez].[4]
François tornent arriers, quant il oent le ban.[5]
Maint s’en vont molt plaignant, quar au cuer ont ahant.[6]
Mainz tasta à son cief où il ot plaie grant ;
Mainz regarda ses braz ki furent tot sanglent ;
Mains benda son costez et descira son pan ;
Mains s’en ala cloçant, molt forment dementant.
Quant le vit Charlemaignes, si jura saint Vincent,
Ne volsist mielz lever del lit de demi an,
- ↑ 13112 L joste. M sevent jeter.
- ↑ 13116 A si furent folz provez.
- ↑ 13119 Clarice reparaît ainsi à tous les moments où sa présence est naturelle. La châtelaine sort alors de sa chambre painturée et se mêle à l’action. Du jour où elle a si discrètement exprimé son amour pour Renaud (4029, 4282-4298), on ne l’oublie jamais complètement.
- ↑ 13130 L senez. A menez.
- ↑ 13131 Lacune dans A de ce vers à 13156.
- ↑ 13132-13136 Répétitions dont les exemples abonderont dans l’épopée italienne.
