Or vos mercierai le lancier de mon tré
Que me fesistes ier, quant l’aigle en fu portés.
Sovenroit vos, Maugis, gardes, nel me celes,
Que me fesis mon cisne et mon paon coper
Et servir devant toi en miliu de mon tref,
Quant tu venis Richart veoir et esgarder
Et tu l’alas Renaut à Montauban conter.
A Monfaucon feïs le secors amener.
Molt chier le te vandrai, ains qu’il soit ajorné. »
« Sire, ce dist Maugis, vostre comant feres.
Ici m’estoit mes termes et mes jors ajornés.
Ne pooie plus vivre, Deu ne venoit à gré ;
Or en ait Jhesus l’ame, car li cors est finés. »
« Ahi ! dist Charlemaignes, quel paor vos aves ! »
Or dirons de Renaut, le vasal aduré,
Qui vint à Montauban, le chastel seignoré.
Là descendi Renaus desos le pin ramé ;
Encontre vait sa fame, au gent cors honoré.
Quant Renaus vit la dame, si le cort acoler.
« Sire, ce dist la dame, où est Richars li ber ? »
« Dame, ce dist Renaus, ja l’avons amené.
S’avons Ripeu pandu quil voloit ancroer. »
« Sire, ce dist la dame, Dex en soit aourés. »
Atant es vos Richars qui la vait acoler ;
Plus de .c. fois li baise et la bouche et le nés.
Or demainent grant joie et li prince et li per.
« Dame, ce dist Renaus, à moi en entendes.
Por amor Dame Deu de sainte majesté,
Veïstes vos Maugis, mon cousin l’aduré ? »
« Naïe, ce dist la dame, par sainte Karité. »
Quant Renaus l’a oï, tos en fu esfraés ;
Lors dist à Aallart : « Ales, si le queres ;
Et vos Guichart, biau frere, et Richart, li mains nés,
Ales querre Maugis el borc à son ostel. »
Cil s’en tornent molt tost, ne sunt aseüré ;
A l’ostel Maugis vienent por le baron trover.
A l’oste demanderent s’il estoit retornés.
« Par foi, ce dist li ostes, nen ai mie encontré.
Onques puis ne le vi qu’il fu o vos alés. »
Page:Castets - La Chanson des quatre fils Aymon, 1909.djvu/657
Le texte de cette page a été corrigé et est conforme au fac-similé.
629
les quatre fils aymon
