Estous li fius Œdon et Salemons li ber.
Gondebues de Vandueil et Hues de Dancler.
Desi que à Renaut ne volrent arester.
D’autre part vint Guichars sor Vairon, ferarmés,
Aallars et Guichars et Maugis l’adurés,
A .cccc. Gascons d’armes bien acesmés,
Et d’une part et d’autre i fu grans li barnés.
Là peüssies veoir .i. estor si mortel,
Tant lance froisie, tant escu estroé,
Tant jantil chevalier à la terre versé.
Rollans point Viellantin des esperons dorés.
Et a trait Durendart qui li pent au costé,
Et vait ferir Renaut parmi l’elme jemé ;
Si grant cop li dona que l’a tot estonné :
« Mar encargastes Charle, mon seignor naturel.
Trop est poisans li rois por ensement porter ;[1]
Je cuit, c’est .i. afaires qui molt iert comparés. »
Molt est dolans Renaus, quant il s’ot escrier,
Et il se sent à cop parmi l’elme fraper ;
Il a traite Froberge au poing d’or neellé,
Et tint bien Charlemaigne, nel laisa mie aler,
Et a dit à Rollant, « Biaus amis, ça venes.
Ne vos en [partes] mie, mais encor recovres. »[2]
Comme Rollans l’oï, à poi n’est forsenés.
Estes les vos ensamble as espées del lés ;
Renaus guerpi le roi, ainc ne l’on sot on gré.
Atant es Aallars qui les a escriés
Et Richars et Guichars ; à Rollant vont joster.
Tot .iii. le vont ferir en son escu listé,
Ou Rollans weille ou nom, del col li ont porté,[3]
Et Richars le coita à l’espée del lés
Rollans par estovoir lor a le dos torné,
Venus est à l’ost Charle dont il estoit sevrés.
Renaus, li fius Aymon, est en Baiart montés
Page:Castets - La Chanson des quatre fils Aymon, 1909.djvu/647
Le texte de cette page a été corrigé et est conforme au fac-similé.
619
les quatre fils aymon