Que ne puis envers vos la bone amor trover.
Et puisqu’il est issi que vos me desfies,
Et, je me garderai, se je puis en non Dé. »
Charles a trait Joieuse, s’a l’escu acolé,
Et Renaus fu tos cois, tres en miliu del pré,
Et voit venir Charlon vers lui tot aïré.
« Hé Dex ! ce dist Renaus, qui me fesistes ne,
Je voi ci mon seignor venir tot abrivé.
Ja nel ferrai premiers, ains saurai sa bonté. »
Challes le va ferir parmi l’elme jemé ;
De Joieuse s’espée li a grant cop doné,
Que les flors et les pieres en a jus craventé,
Et l’escu de son col li a eschantelé.
.c. et .l. mailles de son hauberc safré
Li abati à terre devant lui ens el pré.
Dame Dex le gari par la siue bonté
Qu’il ne l’a en la char ne plaié ne navré.
L’esperon à fin or li a par mi colpé.
Entre ci que au heut le fait el pré coler.
Quant l’a veü Renaus, à poi n’est forsenés ;
Ains nel vost de s’espée ferir ne adeser,[1]
Ains est passés avant, par les flans l’a coubré ;
A son col l’encharga, qu’il l’en voloit porter
Trestot droit à Baiart qui là est enselés.
A sa vois haute et clere commença à crier :
« Où iestes vos, mi frere, et vos, Maugis li ber ?
.i. tel eschec ai fait, se l’en poons porter,
Par lui serons en France paié et acordé. »
Cil n’entendirent mie de Renaut l’aduré,
Et Charles d’autre part se rest haut escriés :
« Ahi ! Rollant, biaus niés, où iestes vos alés ?
Olivier de Viane, et car me secores.
Et vos, sire dus Names et Torpins l’ordenés,
Ja vos ai je forment et chieris et amés. »
Rollans l’a entendu et Oliviers li bers,
Et dus Names de France et Torpins l’ordenés,
Et Ogiers li Danois est cele part alés,
- ↑ 11011 Cf . v. 14053 sq.
