Mais à Baiart ne puet nus metre l’esperon.
Renaug passe le tertre et le val à bandon
Et garde devant lui en un brueillet parfont.
Illuecques a choisi le riche roi Yon,
Où en prison le tienent .iiii. xx. Borgoignon.
Quant l’a veü Renaus, sachies, molt li fu bon ;
Il a broché Baiart des tranchans esperons
Et a traité l’espée qui trance de randon.
Cele part va li quens plus tost que le troton,
Et cil s’unt regardé, s’unt veü le baron,
Et dist li .i. à l’autre : « Or vient ci Finemons.[1]
Qui l’atendra à cop, ja n’aura garisson.
Qui se laira ocirre, ja n’ait s’ame pardon. »
Atant tornent en fuie, si laisent lor prison.
Et Renaus est venus au riche roi Yon,
Si li a desbandés les biaus iex de son front
Et si li desloia et les piés et les pons.
Apres li dist Renaus : « Que pensas, malvais hon,
Ki ensi nos vendis et traïs à Charlon ?
En toi ne remest mie que pendu ne fusson.
Or perdras cele teste, ja n’auras raençon. »
« Certes, ce est bien drois, serorges, gentis hon.
Bien ai mort deservie, ja nel contrediron.
Mais trance moi la teste, Renaut, fius à baron,
Et la langue ensement dont [d]is la traïson.[2]
Et tot çou me fist faire li viscuens d’Avignon,
Antoines li chanus, Hunaus de Tailleborc.
Or me trances la teste, ne quier mais vivre jor.
Me[x] weil que tu m’ocies, que me pandist Charlon. »[3]
Renaus l’a fait monter sor .i. mul ambleor.
« Or en venes, dist il, si parleres à nos. »
Lors chevauce Renaus, s’enmaine roi Yon ;
Et Rollans s’en torna et tot si compaignon
Et passa la riviere, l’ewe de Balençon.
Page:Castets - La Chanson des quatre fils Aymon, 1909.djvu/585
Le texte de cette page a été corrigé et est conforme au fac-similé.
557
les quatre fils aymon
