Mais Baiars a l’avaine desi à l’ajorner,
La fontaine et le fuerre et l’orge bien vané.[1]
[S’]il pooit mengier or, s’en auroit il asses.
Beneoite soit l’eure que tes chevaus fu nés,
Car ne fu tex destriers en la crestienté. »[2]
Quant Baiars se regarde et voit Rollant à terre,
Les piés derriere giete, bruiant comme tempeste.
[Baiars s’en va fuiant, quant l’a laschié la resne],[3]
Fiert le cheval Rollant sor l’oreille senestre.
Ou il vossist ou non, li fist rompre sa reine,
Et li chevaus s’enfuit esbahis desor l’eve.
Quant Rollans l’a veü, a poi que il ne derve.
[I]l a trait Durendart à la clere alemele ;
Vers Baiart est venus, vost li trancier la teste.
Quant Renaut l’a veü, ne le tint mie à befe
Et a dit à Rollant : « Que est ce que vos fetes ?
[J]a est çou vilenie à home de vo geste.
Que demandes Baiart ? Ja est çou une beste.
Se vos voles bataille, vers moi le venes querre ;
Vos en aures asses, par les iols de ma teste.
Laisies moi mon destrier, il n’a meillor en terre.
Et si est mes chevaus, bien est drois qu’il me serve. »
Lors a traite Froberge, del fuerre le deserre,
Et va ferir Rollant amont, parmi son helme,
Que les flors et les pieres en vont jus à le terre,
Et l’escu de son col li fent et eschantele,
Et le pan del hauberc desront et desclavele,[4]
En jusques à la cuise li nus brans li apresse.
Dex le gari de mort et li bers sains Estevenes.[5]
L’esperon de fin or li trancha jusqu’en [l’erbe] ;[6]
Mais onques en la char ne li pot riens forfaire.
Entreci que au heut feri Froberge en terre,
- ↑ 9169 B M Metz : La fontaine sourjant.
- ↑ 9172 M ajoute : Adonc descent Renaus de Baiart l’aduré.
- ↑ 9175 Pris de M, manque à LB.
- ↑ 9194 M ajoute : Et la coife de fer et la peliche bele.
- ↑ 9196 Estevenes vaut deux syllabes. M et le cors saint Ylaire. C et la vierge la Pucelle.
- ↑ 9197 Sic M. L terre répété à satiété.
