« Sire, dist Oliviers, ne place dame Dé
Que je li face mal en trestot mon aé
Por tant que je le puisse guerpir ne eschiver. »
Estous, li fius Oedon, l’en prist à apeler
Et Yudelons li quens et Torpins l’ordenés.
« Merci, sire Rollant, por l’amor dame Dé.
Renaus est de no geste et de no parenté ;
Se l’avies ocis, ne vos porrons amer.[1]
Si requeres le plait que il soit acordés,
Ou vos faites nos gens contre les siens aler.
Miex est que il i muirent .c. chevalier armé
Et .c. en soient pris et d’avoir rachaté,
Que Renaus i soit mors ne vos desalossés.[2]
Quant Deu plaira et Charle, si seront acordé. »
« Seignor, ce dist Rollant, s’iert à vo volenté. »
François sunt descendu, si se sunt ferarmé
Et chevaucent ensamble et rengié et serré.
Renaus crie s’ensaigne Montauban, haut et cler,
Et a dit à ses homes : « De bien ferir penses. »
Tante riche baniere i veïssies porter,
Tant [escu] à lion et tant [espié] doré.[3]
L’uns chevauce vers l’autre por la mort encontrer.
A l’assembler des lances se sunt si coi mené
K’il n’i ot cor ne cri, ne busine soné.[4]
Li Fil Aymon les fierent es escus d’or listés
Et François les reçoivent com chevalier mambré.
Là peüst on veoir tant ruiste cop doné,
Tante lance brisie, tant escu estroé
Et tant hauberc rompu et tant baron navré,
L’un mort deseure l’autre trebuchié et versé,
Et tant cheval corant, sor la montaigne aler,
Dont li seignor sunt mort et en l’estor remes.
Renaus, li fius Aymon, ne s’est aseürés.
Aallars et Guichars et Richars li senés,
Page:Castets - La Chanson des quatre fils Aymon, 1909.djvu/577
Le texte de cette page a été corrigé et est conforme au fac-similé.
549
les quatre fils aymon
