Tant hauberc et tant hiaume et tant brant aceré,
Tant bliaut entaillié, tant hermin engolé,
Tant mal et tant cheval ? franc chevalier, vees.
En cest siecle n’a home ki sache armes porter,
Se il vient à Renaut, puis k’il soit esgarés,
K’il ne soit retenus : dont n’est çou grant bontés ?
Car pleüst or à Deu, ki en crois fu penés,
Qu’il fu à Charlemaigne paiés et acordés.
A chascun de nos homes en a il .iii. armés.
Nos i poons bien perdre, se Dex l’a destiné. »
« Voire, ce dist Rollans, mais Gascoing sunt jant tel
Que au ferir des lances sunt tost desbareté. »
« Voire, dist l’arcevesques, mais il ont conduit tel,
Je croi qu’il n’a meillor en la crestienté.
Li preudon fait les autres entor lui demorer. »
Quant Rollans l’a oï, à poi n’est forsenés ;
Com il oï Renaut à sa gent si loer,
Il en ot molt grant duel, si en fu molt irés.
Il broche Viellentin par en .ii. les costés.
Tos seus, sens compaignon s’en est Rollans tornés.
Et vint contre Renaut .i. arpent mesuré.
Son espié que il tint ficha enmi le pré,
Le confanon de soie au vent desvelopé.
Quant Renaus l’a veü, si l’a bien avisé
Et dist à Aallart : « Biau frere, ça venes.
Awec toute ma gent en cel val arestes ;
Mar s’en partira .i., tant k’arrier me raves.
Je voi venir Rollant sor son cheval armés ;
Ausi revolrai jou encontre lui aler. »
Quant Aallars l’entent, si le cort acoler.
« Merci, sire Renaus, por icele pité
Que Dex ot en la crois, quant il i fu penés,
De Marie sa mere, quant il la vit plorer,
Et il la commenda saint Jehan à garder.
Voles vos tos vos freres à .i. seul cop tuer ?
Li .i. de nos ira, li ques que vos volres. »
« Mais jou, ce dist Renaus, irai à lui parler. »
Baiart, son bon cheval, a maintenant çainglé ;
Son poitral de devant li a molt bien fermé.
Page:Castets - La Chanson des quatre fils Aymon, 1909.djvu/573
Le texte de cette page a été corrigé et est conforme au fac-similé.
545
les quatre fils aymon
