La boele ot fremée sor l’ermin peliçon,
Par la plaie li per[t] le foie et le poumon.[1]
Ses plaies a tantées entor et environ,
Puis en vint à Renaut, si l’a mis à raison.
« Entendes moi, fait il, jantis fix à baron
Vos estes mi cosin, pres nos apartenon,
L’uns ne doit faillir l’autre por or ne por mangon.
Por vos ai sofert paine et traval et labor.[2]
Plus me het Charlemaignes que ne fait nul de vos.
L’autr’ ier ocist mon pere, dont au cuer ai dolor.[3]
Renaut, ce fu vostre oncle, si fu por vostre amor.
S’or endroit m’afies devant tos ces barons
Qu’anuit en ceste nuit irons al tré Charlon
Et requerrons le roi dedans son pavellon
Et ferrons de nos lances se as oels le veons,
Je vos rendrai Richart sain et sau[f] ains .iii. jor[s],[4]
Armé sor son ceval, seant dejoste vos. »[5]
Qant Renaus l’a oï, forment en fu joios ;
A Maugis a baisié et piés et esporons.
« Cosin, ce dist Renaus, se çou me fasies vos,
Que jo mon frere eüsce tot sain et en vigor,
Totes vos volentés feroie sans demor. »
« Oïl, ce dist Maugis, por voir le vos dison.
Tot sain le vos rendrai sans mal et sans langor. »[6]
Maugis ot pris blanc vin k’il ot mis em ver bos ;[7]
Les plaies li lava environ et entor ;
Le sanc vermeil en oste et le trancié braon ;
Puis prist .i. oigement k’il avoit mervellos,
As plaies li toça environ et entor ;
Ralient et rajoignent maintenant sans demor :
Puis li ovre les dens à un cotel raont,
- ↑ 8269 L pet.
- ↑ 8275-8278 Ce passage est très important. Il vise une branche perdue où la mort de Looïs était imputée aux Fils Aymon. Cf. vv. 3111, 3267-3298.
- ↑ 8277 L B L’autrier. M L’autre an.
- ↑ 8283 L sain et saus ains .iiii. jor. B M sauf ains .iii. jors.
- ↑ 8284 L armés. B M armé.
- ↑ 8291 B M ains que past li tiers jors.
- ↑ 8292 B qui fu en une bous. M manque.
