Par Deu, sire Danois, n’aferist mie à vos
Que venissies traïr Renaut, le fil Aymon.
Vos iestes de son lin, à Deu maleïçon ;[1]
Unques li vostres peres ne fu sens traïson ;[2]
Il vos laisa en France forostagié Charlon,[3]
A Saint Omer en Flandres, par tel devision[4]
Dont vos iestes cuivers et sougiés à Charlon,
.iiii. deniers rendans del chief et del menton.
Ogier de Danemarche, entendes ma raison.
Ja fustes vos cousins Girart de Rossillon
Et Doon de Nantueil et duc Buef d’Aigremon.
Icil .iii. furent frere au riche duc Aymon.
Ne traies à lor geste vaillant .i. porion,
Ains [re]traies as [maus], as traïtors felons.[5]
Ogier, je vos desfi, n’en sai autre sermon. »
Lors lait corre Baiart, le destrier arragon,
Et il li cort plus tost que ne vole faucons,
Et vait ferir Ogier en l’escu au lion.
Desos la bocle d’or li peçoie et confont,
Et l’auberc de son dos li desmaille et desront.
Durement l’a feru par encoste l’arçon,
Que sa lance peçoie et vole par tronçons ;
En l’escu est remes li vermaus confanons.
Quant Ogiers l’a veü, à poi d’ire ne font ;
Tornés fust sor Maugis à coite d’esperon,
Quant Baiars se regarde vers la roche Mabon.
S’a veü son segnor, Renaut, le fil Aimon.
Il le conut plus tost que fame son baron.[6]
Baiars i vint poignant, Maugis vossist ou nom.
Quant vint devant Renaut, oies de l’arragon :
Sos [Maugis] s’agenoille illuecques el sablon ;[7]
Maugis descent à terre del bon destrier gascon
Et a rendu ses armes Renaut, le fil Aymon.
Il a vestu l’auberc, lacié l’iaume reont,
Page:Castets - La Chanson des quatre fils Aymon, 1909.djvu/538
Le texte de cette page a été corrigé et est conforme au fac-similé.
510
les quatre fils aymon
