Ogiers choisist les contes qui si sunt tormenté ;
Trestos li plus aidans ne puet sor piés ester.
Quant Ogiers l’a veü, si comence à plorer,
D’une molt grant voisdie se prist à porpenser.
Dant Girart l’Espanois comence à apeler.
« Girart, ce dist Ogiers, à moi en entendes.
Vestes en vostre dos .i. blanc hauberc safré,
De trestotes vos armes molt bien vos conrees ;
Menes en vo conduit .c. chevaliers armés.
El mont de la Hansoie, là vos ires ester.[1]
Gardes vers Montauban tot le chemin ferré,
Que n’en isse nus hom qui soit de mere nés.
Car se Maugis en ot mot tentir ne soner,
Il nos envoiera si fort mes au disner
K’a tot le plus hardi saigneront li costé. »
« Sire, ce dist Girars, à vostre volenté. »
Lors a vestu l’auberc, lacé l’elme gesmé,
Et a çainte l’espée au senestre costé,
Et monte en son corsier ki bien est abrivés,
Et prent en sa compaigne dusqu’à .c. bachelers.
El mont de la Hansoie s’en sunt trestot alé ;
Li plusor descendirent des destriers abrivés,
Et li auquant s’apuient sor les arçons dorés ;
Gardent vers Montauban tot le chemin ferré.
Ogiers ne le fist mie por François aïder ;
Ains voloit ceus dedans durement esfreer,
Savoir se ja Maugis se poïst apenser
Que il feïst secors son seignor naturel.
Or vos lairons ici de ces barons ester,
[Et quant lieu en sera, bien en saron parler] ;[2]
Si dirons de Gontart, le waillant clerc letré,
Qui ot liute la chartre où la traïsons ert.
De gentil duc Renaut se prist à porpenser
Et [d’Aalart son frere, le vaillant bacheler,[3]
Et] de ses autres freres qui molt font à amer,
Page:Castets - La Chanson des quatre fils Aymon, 1909.djvu/529
Le texte de cette page a été corrigé et est conforme au fac-similé.
501
les quatre fils aymon