Por icel saint apostre c’on quiert en pré Noiron,
Ne le garroit chastiaus, fermetés ne dongon,
Ne le ferisse el cors d’un espié à bandon ;[1]
Car je has plus le mien, s’il me fait traïson,
Que je ne fas .i. autre, par Deu et par son nom. »
« Renaut, je n’en puis mais, si ait m’ame pardon.
[Charles me fist plevir, ou je volsisse ou non,[2]
Que ne vos aideroie le pris d’un esperon].
De tant con je en fas, aurai mal guerredon. »
Il se dist voir ; Ogiers molt en fu [puis embrons] ;[3]
Rollans l’en apela de mortel traïson
Ens el tref Charlemaigne, voiant tos ses barons.
Atant s’asiet Renaus et Aalars li blons
Et Guichars li cortois qui molt fu engoisous ;[4]
Mais tost resaut en piés Renaus, li fius Aymon,
Et assemble les pieres dont il se desfendront
Et garnist les desfenses où si frere seront.
Et François s’escrierent, et Normant et Breton :
« Ogier de Danemarche, ci a molt lonc sermon.
Que dient il là sus ? saves s’il se rend[r]ont ? »[5]
« Nenil, ce dist Ogiers, tant con vivre porront. »[6]
Et respondent François : « Et nos les asaudron. »
« Seignor, ce dist Ogiers, et nos resgarderom. »
Ce dist li quens Guimars et Faus de Monjançon :
« Ogier de Danemarche, par nom vos semonom,
De par le roi de France, que venes en l’estor.
Se nos aidies de cuer, aparmain les auron. »[7]
« Seignor, ce dist Ogiers, franc chevalier baron,
Ja ce sunt mi cousin qui vont en la prison.
[Merci vos pri por Deu qui soufri passion] :[8]
Chascun de vos donrai ou chastel ou dongon
Ou tant de mon avoir qu’il sera riches hom,
Page:Castets - La Chanson des quatre fils Aymon, 1909.djvu/527
Le texte de cette page a été corrigé et est conforme au fac-similé.
499
les quatre fils aymon