Ki asambla tant jant por .iiii. compaignon ?
Se estiens .v.c., n’en estordroit uns sols. »
« Certes, dist Aallars, molt en ai grant [friçon][1].
Ce n’est mie damages ne de moi ne de vos,
Ne de Richart le conte, se nos .iii. i moron ;[2]
Mais del baron Renaut par ert tele dolor,
Onques ne fu si grant[3] por nul home del mont. »
Il vont baisier Renaut le pié et le talon.[4]
« Ahi ! frere, font il, car nos dones .i. don,
Por amor cel seignor ki vint à passion. »
« Segnor, ce dist Renaus, ke me demandes vos ?
Je ne vos puis aidier ne faire nul socors.
Hui vos verai morir devant moi à dolor. »
« Sire, dist Aallars, oes ke nos queron.
Encor s’adobent Franc en cel bruellet reont.
Descendes de la roce, Renaut, fix à baron,[5]
Montes en vo destrier ki bons est et gascons.
Vos aves tel espée ki n’a mellor el mont.
Bien vos pores garir et nos ci remandron.
N’ert mie grant damage, se nos .iiii. i moron,
Et vos en ires, sire, broçant à esporon,
Tot droit à Montalban, ens el maistre donjon.
Se avïes Baïart, le destrier aragon,[6]
Se damel Deu plaisoit, bien averiens socors.
Biax sire, car le faites, por Deu et por ses nons.
Nos remandrons ici et si nos combatrons ;
Molt nos i vendrons cier, ains que nos i moron. »
« Segnor, ce dist Renaus, vos parles en pardon.
Certes, je nel feroie por tot l’or de cest mont,
Ne por tote l’onor le rice roi Yon.
Molt seroie mauvais, foi que doi saint Simon,
Se je vos i laisoie ci de mort à bandon.
Ou nos i garron tuit, ou nos tuit i moron.
Ja nus ne faudra l’autre, tant comme nos vivon.
- ↑ 7285 M friçon. L dolor, déjà trois lignes plus haut et qui revient trois lignes plus bas. Metz : iror.
- ↑ 7287 L M le conte. Metz : de Richart l’enfant
- ↑ 7289 L M si grant. Metz : grengnor.
- ↑ 7290 manque à Metz. M le vis et le menton.
- ↑ 7298 Sic L M. Metz : gentex fiex à.
- ↑ 7905 Sic L M. Metz : aviies.