Li chevaus sor qu’il sist, n’i respont .i. boton.
Lors regreta Baiart, son destrier arragon :
« Hé ! Baiart, bons chevaus, que je ne soi sor vos !
Certes mar acointassent la mortel traïson. »
Lors broche le cheval Renaus, li fius Aymon
Et a brandie l’ante, destort le confanon ;
Vait ferir en l’escu le conte [Haguenon],[1]
.i. gentil chevalier qui fu nés de Soison,
Que l’escu li perça et l’auberc li derront.
Parmi le cors li mist et l’ante et le penon,
Del cheval l’abat mort devant lui el sablon ;
Puis a traite l’espée qui li pent au giron
Et vait ferir Robert, le seignor de Digon,
.i. jentil chevalier, fius Aubri le Borgon.
La teste o tot le hiaume fist voler el sablon ;
Ainc arme qu’il eüst ne li fist garison ;
Tot le fendi li bers entreci qu’el menton.
Bien en a ocis .x. trestot en .i. randon,
Puis crie « Montauban », clerement, à haut ton.
« Hé Dex ! où sunt mi frere ? Sire, gardes les nos.
Trop me sunt eslongié, jamais n’asembleron. »
Atant es vos venu Aallars le baron ;
Cheval ot recovré, si seoit en l’arçon.
Escu avoit el col et forte lance el poin,
Et si avoit ocis .i. chevalier baron
De la maisnie Charle, le roi de Montloon ;
Mais il estoit navré d’un espié à bandon.
Deles Renaut s’acoste Aallars li frans hom
Et Guichars ensement et Richars li menor,
Et ont dit à Renaut le nobile baron :
« Jamais ne vos faudron tant comme nos vivon. »
Estes vos assemblé les .iiii. compaignons ;
Des François qu’il troverent font grant confusion.
« Par foi, dist l’un à l’autre, or revient Finemons.[2]
- ↑ 7008 M Haguenon. B Huguenon L le conte d’Avignon. Michelant dans sa note ne s’étonne point que le comte d’Avignon soit né de Soissons, et oublie que Renaud a déjà tué le comte d’Avignon, cil ki dona conseil au roi Yon Et ki plus li loa la mortel traïson aux vers 6799-6806.
- ↑ 7035 M veschi grant Fineson.
